Nënshkruhet Kontrata e Grantit për Projektin për Sigurimin e një Makine Zjarrfikëse për Bashkinë Dibër në kuadër të skemës së “Granteve për Projekte të Sigurisë Njerëzore në Nivel Lokal për vitin fiskal 2024”.

   Të premten, më 25 tetor, në Ambasadën e Japonisë u mbajt ceremonia e nënshkrimit të kontratës së grantit për "Projektin e Sigurimit të një Zjarrfikëseje të Përdorur për Bashkinë Dibër" në kuadër të “Granteve për Projekte të Sigurisë Njerëzore në Nivel Lokal për vitin fiskal 2024”. Kontrata e grantit u nënshkrua mes Ambasadores Kato dhe Drejtorit Ekzekutiv të Agro Eko Dibra, z. Hajrullai. Si rezultat i këtij projekti, në një bashkëpunim me Shoqatën për Promovimin e Diplomacisë Japoneze (SPJD), Bashkisë së Dibrës do t'i sigurohet një makinë zjarrfikëse, duke rritur kapacitetin e bashkisë për t’ju përgjigjur emergjencave dhe fatkeqësive nga zjarri.  

 
   Në ceremoninë e nënshkrimit, Ambasadorja Kato shprehu urimin që ky bashkëpunim të kontribuojë në parandalimin e fatkeqësive natyrore në Bashkinë e Dibrës. Drejtori ekzekutiv, z. Hajrullai dhe Drejtori i Departamentit të Mbrojtjes nga Zjarri dhe Shpëtimit të Bashkisë Dibër, z.Gjoka, shprehën mirënjohje për bashkëpunimin e treguar nga Japonia.