Dhurimi i Librave për Bibliotekën e Universitetit Bujqësor të Tiranës përmes Projektit "READ JAPAN", mbështetur nga Nippon Foundation dhe Tokio Foundation for Policy Research

    Të martën, më datë 21 maj 2024, Ambasadorja KATO mori pjesë në ceremoninë e dhurimit të librave në Bibliotekën “Mentor Përmeti” të Universitetit Bujqësor të Tiranës. Dhurimi u bë përmes projektit "READ JAPAN " i mbështetur nga Nippon Foundation dhe Tokyo Foundation for Policy Research.

    Nippon Foundation filloi projektin READ JAPAN në vitin 2008 për të promovuar të kuptuarit e Japonisë përmes dhurimit të librave të lidhur me të në gjuhën angleze, në universitetet dhe bibliotekat në mbarë botën. Projekti administrohet nga Tokyo Foundation for Policy Research me mbështetjen e Nippon Foundation.

    Bibliotekës iu dhuruan 157 libra të shkruar në gjuhën angleze të fokusuara në fusha si politika, ekonomia, kultura dhe jeta shoqërore në Japoni, duke shënuar donacionin e 14-të në Shqipëri në kuadër të këtij projekti, që nga viti 2011.


 

    Në ceremoninë e dhurimit, ku morën pjesë edhe Prof. Dr. Fatbardh Sallaku, Rektor i Universitetit Bujqësor të Tiranës dhe znj. Renata Bardhi, Drejtore e Bibliotekës, ambasadorja Kato shprehu dëshirën që nëpërmjet këtij donacioni, për një nga institucionet më të vjetra të arsimit të lartë në Shqipëri, studentët dhe anëtarët e fakultetit të thellojnë njohuritë e tyre për Japoninë dhe të forcohet mirëkuptimi i ndërsjellë midis dy vendeve. Ambasadorja Kato gjithashtu u shpreh se shpreson se marrëdhëniet e mira mes Ambasadës Japoneze dhe Universitetit Bujqësor të Tiranës do të forcohen më tej.

    Rektori Sallaku dhe drejtorja e bibliotekës Bardhi shprehën mirënjohjen e tyre për dhurimin e librave.