Përshëndetje e Ambasadorit TAKADA

2021/1/10

Emri im është TAKADA Mitsuyuki dhe jam emëruar Ambasador i Japonisë në Shqipëri. Më 24 dhjetor, të vitit të kaluar, i paraqita Letrat Kredenciale Presidentit Meta dhe fillova detyrën si Ambasador i Japonisë. Nga kontaktet që kam pasur me qytetarët Shqiptarë që nga mbërritja ime ne Tiranë, kam krijuar përshtypjen se populli Shqiptar është një popull me histori dhe kulturë të pasur. Për ta familja zë një vend të rëndësishëm, dhe në marrëdhënie me të huajt, janë mikpritës, të sjellshëm dhe miqësor.

Për shumë vite unë kam punuar në një kompani të madhe tregtare dhe jam angazhuar në çështje tregtie dhe investimesh. Bazuar në eksperiencën time në këtë fushë, do të bëj përpjekje për thellimin e mëtejshëm të marrëdhënieve midis dy vendeve jo vetëm në aspektin diplomatik por edhe në fusha të tjera si tregtia, investimet, shkëmbimet kulturore, etj. Marrëdhëniet diplomatike midis Japonisë dhe Shqipërisë u rivendosën në 1981, ndërkohë që viti 2021 shënon vitin e pestë që nga hapja Ambasadës së Japonisë në Shqipëri në 2017. Unë jam Ambasadori i dytë i Japonisë rezident në Shqipëri.

Vitin e kaluar u hapën negociatat për pranimin e Shqipërisë në BE. Në kuadër të "Nismës për Bashkëpunim në Ballkanin Perëndimor" Japonia mbështet përpjekjet e Shqipërisë për t'u bërë pjesë e BE. Asistenca Zyrtare për Zhvillim e Japonisë ndaj Shqipërisë ka nisur në vitin 1990 dhe nëpërmjet huave, bashkëpunimit teknik dhe granteve, ka kontribuar në përmirësimin e standardeve të jetesës së popullit shqiptar. Përveç kësaj, marrëdhëniet bilaterale midis dy vendeve janë forcuar përmes vizitave dhe takimeve të disa personaliteteve nga të dy shtetet, duke permendur ketu vizitën e Presidentit Meta në Japoni me rastin e Ceremonisë të Kurorëzimit të Perandorit në tetor të vitit 2019.

Në fushën e ekonomisë, vitin e kaluar, u realizua investimi i parë në shkallë të gjerë nga një kompani japoneze në vend, dhe këtë vit ajo do të fillojë të operojë me funksion të plotë. Ne si ambasadë do të vazhdojmë të mbështesim dhe do të përpiqemi të rrisim investimet e kompanive japoneze në Shqipëri. Për sa i përket sportit dhe kulturës, shpresoj që Lojërat Olimpike dhe Paraolimpike të Tokios të këtij viti të zhvillohen me sukses në këto kushte të vështira të krijuara nga kriza e koronavirusit, dhe që marrëdhëniet midis dy vendeve në fushën e sportit të thellohen.

Siguria e qytetarëve japonez resident apo vizitorë në Shqipëri është një detyrë e rëndësishme e ambasadës dhe ne dëshirojmë të jemi gjithmonë pranë jush. Nëse keni ndonjë pyetje ose shqetësim, mos hezitoni të na kontaktoni.

Shpresoj që situata me koronavirusin e ri (COVID-19) të përfundojë sa më shpejt dhe ju uroj të gjithëve shëndet dhe lumturi!
 
10 Janar 2021
Ambasador i Jashtëzakonshëm dhe Fuqiplotë
TAKADA Mitsuyuki