Ceremonia e Dorëzimit të Pajisjeve në kuadër të Projektit të JICA-s “Për Rritjen e Kapaciteteve për të Luftuar Sëmundjet Infektive, përfshirë Covid-19”

2022/11/22

Më 18 nëntor, Ambasadori Takada mori pjesë në Ceremoninë e Dorëzimit të pajisjeve në kuadër të projektit të JICA-s në bashkëpunim me Institutin Kombëtar të Shëndetit Publik (ISHP), “Projekti për Rritjen e Kapaciteteve për të Luftuar Sëmundjet Infektive, përfshirë Covid-19". Së bashku me Ambasadorin, në këtë ceremoni morën pjesë edhe Ministrja e Shëndetësisë dhe Mbrojtjes Sociale, znj. Manastirliu, Drejtoresha e ISHP znj. Tomini, dhe Kryepërfaqësuesi i Zyrës për Ballkanin të Agjencisë Japoneze të Bashkëpunimit Ndërkombëtar (JICA) z. Ueki.

Projekti synon të përmirësojë kapacitetet e Institutit Kombëtar të Shëndetit Publik të Shqipërisë në luftën kundër sëmundjeve infektive, përfshirë Covid-19. Ky bashkëpunim synon të zgjerojë dhe lehtësojë proçesin e vaksinimit duke siguruar 10 automjete 4x4, të zgjerojë kapacitetin e ruajtjes dhe transportit të vaksinave duke siguruar 2 furgona frigoriferikë, dhe 5 frigoriferë ultrangirës, si dhe të rrisë kapacitetet e burimeve njerëzore përmes trajnimeve.