Firmoset Marrëveshja e Grantit me Spitalin Universitar Obstetrik Gjinekologjik "Mbretëresha Geraldinë" në kuadër të skemës së “Granteve të Qeverisë Japoneze për Projekte të Sigurisë Njerëzore në Nivel Lokal”

Më datë 13 nëntor, në ambientet e maternitetit “Mbretëresha Geraldinë“, u zhvillua ceremonia e firmosjes së Grantit për “Projektin për mundësimin e pajisjeve mjekësore për Spitalin Universitar Obstetrik Gjinekologjik "Mbretëresha Geraldinë". Marrëveshja e grantit u firmos nga Sh.T Z. Makoto Ito Ambasador i Japonisë në Shqipëri dhe Znj. Eliona Demaliaj, Drejtoreshë e Spitalit Universitar Obstetrik Gjinekologjik "Mbretëresha Geraldinë". Ministrja e Shëndetësisë dhe Mbrojtjes Sociale Sh.S.Znj. Ogerta Manastirliu, ishte e pranishme në këtë aktivitet.
Në kuadër të këtij bashkëpunimi do të mundësohet blerja e një pajisje laparoskopie 3D per spitalin. Në fjalimin e saj gjatë këtij eventi, Ministrja Manastirliu i shprehu mirënjohjen e saj Qeverisë Japoneze. Ndërkohë Ambasadori Ito shprehu pritshmëritë e tij se përmes këtij projekti do të përmirësohet shërbimi mjekësor në Spitalin Universitar Obstetrik Gjinekologjik "Mbretëresha Geraldinë".